غصن حنه

كريم الجسار

( شبهّتك احببت شبيهك ادركت لماذا اجدادي عبدوا الاصنام)

هذا المقطع الجميل للشاعره الكبيره وقد استعرته قبل خمسة

وعشرين عاما لاضعه مقدمه لقصيدتي واتمنى من قصيدتي

ان تمنجني السماح

بكـت منج وبعض البوك مشروع

والمثلج على الزينات يكدر

مو كل التعذر عذره مسموع

ولا كل اليبوك يبوك مظطر

لكن من يصير بعذر متبوع

حر اليعذر وحر التعذر

ادري الورد للشم كطعه ممنوع

بس هوه الورد عا لكطع يسحر

لايبجي بجي الصفصاف ويلوع

ولا بالمزهريه الورد يكبر

خد الورد تو يتروه بدموع

جا عافه النده وبالليل سافر

وانه عندي *** بالقافيه يموع

لايصبر ول يرضه ايتصّبرط

يعبر ليله وكفه بنفس مكطوع

خانك عبرته وكوه ايتحسّر

ولوما حزمنّه بحسرته ضلوع

جا طك طكة البيضه وتفسّر

وانتي من القوافي البيض ينبوع

فيضه من الشعر وافياي عنبر

واحه من القصايد خضرة اربوع

ناعورج ذهب وجروف مرمر

مرسم للصور كل لمحه موضوع

كل سرحة خيال تصير منظر

غصنج حنه شب من اول سبوع

وظل طول العمر للشمس ينشر

باقي الطعم نفسه ولونه والنوع

ملح شطوط ملحه وما تغيّر

وغصن الحنه لو من هرشه مشلوع

هم يبقى بعبيره ولونه الاخضر

الشعر يام الشعر دمعات مفجوع

تندل شاعر البعيونه تسهر

وسوك اهل الشعر بايع ومبيوع

بس يريد شرايه اتخيّر

صح عمر النجوم غياب وطلوع

بس ياهي اليحطهه الليل معبر

مو كل المشه ويه الجرف دافوع

ولا كل اليكول الشعر يشعر

الشعر ينعد شعر من يظل مطبوع

طبع بالذاكره وعالبال عمّر

وانا جسّار مهري يكطّع صروع

لكن ما دنت نفسه وتجسّر

ينكز للسما نكزة الملسوع

بس من يكرب على العيب يعثر

صح غربه وليالي يذوبن شموع

واجر بالحارمه وكود الله تنجر

والسجه اصبحت بيبان وفروع

يطولن وانه ادك والعمر يكصر

لكن من عبرته براس مرفوع

ولا متندم العمر التطشر

بعده الصبر ثيله بروحي مزروع

كل ما حشته الصدمات يكثر

* القيت في الحفل التكريمي الذي اقامته السفاره العراقيه في الولايات المتحدة لتكريم الشاعره الكبيرة لميعه عباس عماره يوم 20/4/2008